वीरगञ्ज आनन्द पटेल।
दुर्गा पूजाको अवसरमा पर्सा तथा आसपासका विभिन्न गाउँटोलबाट हजारौँ भक्तजन त्रिवेणी नदीमा जल भर्न पुगेका छन्। धार्मिक आस्था र परम्परासँग जोडिएको जलयात्रामा भक्तजनहरू धुमधामका साथ सहभागी भएका छन्।
बहुअरी, पिपरा, लछुमनवा, त्रिवेणी, चैनपुर, मुर्ली, नगवा, इनर्वा, प्रसौनी, फेटा लगायतका गाउँ तथा टोलबाट आएका भक्तजनहरूले त्रिवेणी नदीमा जल भरेर आ–आफ्नो गन्तव्यतर्फ जलयात्रा सुरु गरेका हुन्।
दुर्गा पूजाको अवसरमा आयोजना हुने यस जलयात्रामा भक्तजनहरू बाजागाजा र धार्मिक उत्साहका साथ सहभागी भएका छन्। विभिन्न गाउँटोलबाट आएका श्रद्धालुहरूको सहभागिताले जलयात्रालाई थप उत्साहपूर्ण बनाएको छ। जल भर्न नदी पुगेका भक्तजनहरू पूजापाठ तथा धार्मिक विधि पूरा गरी जल लिएर फर्किएका छन्।
मधेस प्रदेशमा दुर्गा पूजाका अवसरमा नदीबाट जल भरेर धार्मिक अनुष्ठानमा प्रयोग गर्ने परम्परा रहि आएको छ। यस अवसरमा भक्तजनहरू समूहगत रूपमा नदीसम्म पुग्ने र जल लिएर आ–आफ्नो गाउँटोल फर्कने गर्छन्। पुस्तौँदेखि चल्दै आएको यो परम्परा स्थानीय धार्मिक आस्था, संस्कृति र सामाजिक एकताको प्रतीकका रूपमा समेत रहेको छ।
जलयात्रामा सहभागी भक्तजनहरूले माता दुर्गासँग परिवारको सुख, शान्ति, समृद्धि, सुस्वास्थ्य तथा समाजमा अमनचयन कायम रहोस् भन्ने कामना गरेका छन्। दुर्गा पूजाका अवसरमा गाउँटोलमा देखिएको धार्मिक उत्साहले मधेसको मौलिक संस्कृति र परम्परालाई थप जीवन्त बनाएको छ।
त्रिवेणी नदीमा जल भर्न विभिन्न गाउँटोलबाट भक्तजनहरूको उल्लेख्य सहभागिता हुनुले दुर्गा पूजा प्रतिको धार्मिक आस्था र स्थानीय समुदायको सांस्कृतिक एकतालाई प्रतिबिम्बित गरेको छ।
