वीरगञ्ज, १४ भदौ । वीरगञ्जका वरिष्ठ उद्योगपति, समाजसेवी तथा रुङ्टा ग्रुपका अध्यक्ष मुरलीधर रुङ्टाले बाढी तथा पहिरो प्रभावित नागरिकको राहत, उद्धार तथा पुनःस्थापनाका लागि २ करोड १ लाख रुपैयाँ सहयोग गरेका छन्।
रुङ्टा ग्रुपअन्तर्गत सञ्चालित विभिन्न उद्योग तथा प्रतिष्ठानबाट सामाजिक उत्तरदायित्वअन्तर्गत उक्त रकम प्रधानमन्त्री दैवी प्रकोप उद्धार कोषमा जम्मा गरिएको हो।
यसअघि शनिबार हरिखेतान बहुमुखी कलेजमा आयोजित कार्यक्रममा कलेज व्यवस्थापन समितिका कोषाध्यक्षसमेत रहेका सुरेशकुमार रुङ्टाले बाढी तथा पहिरो प्रभावितका लागि ३० देखि ४० लाख रुपैयाँ सहयोग गर्ने घोषणा गरेका थिए। तर, घोषणाको भोलिपल्टै रुङ्टा ग्रुपले प्रतिबद्ध रकमभन्दा करिब छ गुणा बढी २ करोड १ लाख रुपैयाँ सहयोग गरेको हो।
रुङ्टा ग्रुपका सञ्चालक सुरेशकुमार रुङ्टाले प्रधानमन्त्री दैवी प्रकोप उद्धार कोषका लागि २ करोड १ लाख रुपैयाँको चेक हस्तान्तरण गरेका छन्।
देशका विभिन्न क्षेत्रमा बाढी तथा पहिरोका कारण ठूलो जनधनको क्षति भइरहेको अवस्थामा प्रभावित नागरिकको तत्काल राहत, उद्धार तथा पुनःस्थापनामा सहयोग पुगोस् भन्ने उद्देश्यले रकम प्रदान गरिएको ग्रुपले जनाएको छ।
रुङ्टा ग्रुपले उद्योग तथा व्यवसायसँगै सामाजिक उत्तरदायित्वलाई प्राथमिकतामा राख्दै विपद्, स्वास्थ्य, शिक्षा तथा सामाजिक सेवाका क्षेत्रमा विभिन्न सहयोग गर्दै आएको जनाएको छ।
सञ्चालक सुरेशकुमार रुङ्टाले आगामी दिनमा पनि आवश्यकता र परिस्थितिअनुसार विपद् तथा सामाजिक सेवाका क्षेत्रमा सहयोग र सहकार्यलाई निरन्तरता दिने प्रतिबद्धता व्यक्त गरेका छन्।
विपद्को कठिन घडीमा निजी क्षेत्रबाट गरिएको २ करोड १ लाख रुपैयाँको सहयोगले प्रभावित नागरिकको राहत तथा पुनःस्थापनामा महत्वपूर्ण योगदान पुग्ने अपेक्षा गरिएको छ।
