वीरगन्ज ।
वीरगन्ज महानगरपालिका वडा नम्बर २५ का वडा अध्यक्ष आशुतोष चतुर्वेदीलाई प्रहरीले पक्राउ गरेको विरोधमा महानगरका सम्पूर्ण वडा अध्यक्षहरु आन्दोलित भएका छन्। उनीहरुले पक्राउ परेका वडा अध्यक्षलाई तत्काल थुनामुक्त गर्न जोडदार माग गर्दै, रिहा नगरिए चरणबद्ध आन्दोलनमा उत्रिने चेतावनी दिएका छन्।
गत साउन ९ गते (मिति २०८३/०४/०९) नारायणी अस्पतालमा उपचारका क्रममा चिकित्सकको लापरवाहीका कारण वीरगन्ज वडा नं. २४ का राजकुमार कुर्मीको असामयिक निधन भएको थियो। सो घटनापश्चात उत्पन्न परिस्थिति, पीडित परिवारको गुनासो र चिकित्सकमाथि भएको भनिएको दुर्व्यवहारको उचित तथा न्यायसम्मत समाधान खोज्न वडा अध्यक्षहरुले स्थानीय प्रशासनलाई सघाइरहेको अवस्थामा एक्कासी वडा अध्यक्ष चतुर्वेदी पक्राउ परेका हुन्। स्थानीय प्रहरी प्रशासनले उनलाई महानगरपालिका कार्यालयको परिसरबाटै धरपकड गरेको थियो।
मिति २०८३/०४/१२ मा एक वक्तव्य जारी गर्दै सम्पूर्ण वडा अध्यक्षहरुले उक्त धरपकडप्रति गम्भीर आपत्ति जनाएका छन्। नगरबासीको हकहित संरक्षणका लागि आवाज उठाउने आफ्नो दायित्व पूरा गर्ने क्रममा राखेको विचारलाई नै आधार बनाएर जननिर्वाचित प्रतिनिधिमाथि गरिएको धरपकडको उनीहरुले कडा भर्त्सना गरेका छन्।
जारी वक्तव्यमार्फत उनीहरुले पक्राउ परेका वडा अध्यक्षलाई तत्काल रिहा नगरिएको खण्डमा यही साउन १३ गते (मिति २०८३/०४/१३) देखि क्रमबद्ध रुपमा आन्दोलनका कार्यक्रमहरु अघि बढाउन बाध्य हुने भन्दै स्थानीय प्रशासनलाई अल्टिमेटम समेत दिएका छन्। प्रेस बिज्ञप्ति मा उल्लेख गरिएको छ।
