जनकपुरधाममा सरोकारवालाहरूले बालविवाह अन्त्य गर्ने उद्देश्यसहित ९ बुँदे सामूहिक प्रतिबद्धता जनाएका छन्।
राष्ट्रिय बालअधिकार परिषद्, जस्ट राईट फर चिल्ड्रेन इन नेपाल र जनजागरण युवा क्लब बाराको संयुक्त आयोजनामा भएको कार्यक्रममा ‘बाल विवाह अन्त्यका लागि राष्ट्रिय रणनीति तथा कार्यान्वयन कार्ययोजना २०८२ को कार्यान्वयनमा प्रदेश तथा स्थानीय तहको भूमिका’ विषयमा छलफल गर्दै उक्त प्रतिबद्धता गरिएको हो।
प्रतिबद्धताअनुसार नेपाल सरकार, प्रदेश सरकार र स्थानीय तहका प्रतिनिधिहरूले बालविवाहविरुद्ध शून्य सहनशीलताको नीति अपनाउने, नीति तथा कार्यक्रममा यसलाई प्राथमिकतामा राख्ने तथा बालबालिका सम्बन्धी ऐन २०७५ को प्रभावकारी कार्यान्वयन गर्ने उल्लेख छ।
त्यस्तै बालविवाह अन्त्यका लागि आवश्यक बजेट विनियोजन गर्ने, सरोकारवालाबीच एकद्वार प्रणालीमार्फत समन्वय गरी कार्यक्रम सञ्चालन गर्ने, घरपरिवारदेखि समुदायस्तरसम्म जनचेतनामूलक अभियान सञ्चालन गर्ने प्रतिबद्धता पनि जनाइएको छ।
साथै बालबालिकामाथि हुने हिंसा तथा दुव्र्यवहारलाई कानुनी दायरामा ल्याई कारबाही अघि बढाउने र पालिकालाई बालविवाहमुक्त घोषणा गर्न पहल गर्ने विषय पनि समेटिएको छ।
कार्यक्रमका प्रमुख अतिथि मधेश प्रदेशका भूमि व्यवस्था, कृषि तथा सहकारी मन्त्री श्याम प्रसाद पटेलले बालविवाह अन्त्यका लागि सबै पक्ष जिम्मेवार र इमान्दार हुनुपर्ने बताए। कार्यक्रम जनजागरण युवा क्लब बाराका कार्यबाहक अध्यक्ष राजदेव साहको अध्यक्षतामा सम्पन्न भएको थियो।