सिराहा, मिर्चैया — अस्थायी ट्राफिक प्रहरी पोष्ट मिर्चैयाले यहाँको सडक सुरक्षामा जनचेतना अभिवृद्धि गर्न विशेष अभियान सञ्चालन गरेको छ। “अभिभावक नै आफ्नो घरपरिवारको पहिलो प्रहरी हुन्” भन्ने मूल संदेशका साथ पोष्टले अभिभावकलाई आफ्ना सदस्यहरूलाई हेलमेट प्रयोग, लाइसेन्स जाँच, र ट्राफिक नियम पालनामा बेलैमा सचेत गराउन अनुरोध गरेको छ।

प्रहरी सहायक निरीक्षक सुनील साह तेलीले जानकारी दिए, “हामीले विद्यालयका विद्यार्थी, सवारी चालक, स्थानीय व्यवसायी र छरछिमेकका बासिन्दालाई लक्षित गरी निरन्तर जनचेतना कार्यक्रम सञ्चालन गर्दै आएका छौँ। यसले सडक दुर्घटना न्यूनीकरणमा ठूलो योगदान पुर्याउँछ। अभिभावकले आफ्नै परिवारभित्र ट्राफिक नियमको महत्व बुझाउन सकेमा समाजमा सकारात्मक परिवर्तन आउँछ।”

पोष्टले अपिल गरेको छ कि अभिभावकहरूले आफ्ना सन्तान वा घरपरिवारका सदस्यहरूलाई अनावश्यक गफ चुटेर बस्ने सट्टा ट्राफिक नियम र नैतिक शिक्षा दिने अवसरका रूपमा प्रयोग गर्नुपर्छ। यसले कानूनी दण्डबाट जोगिन मात्र होइन, दुर्घटनाबाट ज्यान र सम्पत्ति सुरक्षित राख्न पनि सहयोग पुर्‍याउँछ।

स्थानीय बासिन्दा रामबहादुर यादवले भने, “हामीले देखेका छौँ, सडकमा हेलमेट नलगाएर सवारी गर्ने धेरै युवा छन्। यस्ता सचेतना कार्यक्रमले हाम्रो परिवार र समाजलाई सुरक्षित राख्न मद्दत गर्छ।”

पोष्टले आगामी दिनमा पनि विद्यालय र सार्वजनिक स्थानहरूमा ट्राफिक जनचेतना अभियान जारी राख्ने योजना बनाएको छ। प्रहरीका अनुसार सामूहिक प्रयास र घरपरिवारमा सिकाइ–दिइ कार्यक्रमले मात्र मिर्चैया क्षेत्रलाई दुर्घटना मुक्त र अनुशासित बनाउन सकिन्छ।