ठोरी गाउँपालिकाको १८ करोडको अस्पताल : माननीय टेक बहादुर शाक्यद्वारा अनुगमन, पटक–पटक म्याद थप, ‘कार्यसम्पन्न’ प्रमाणपत्रका आधारमा ठेकेदारलाई भुक्तानी, सेवा सुरु नहुँदा स्थानीय जनताको चर्को विरोध, तथ्यगत छानबिनको माग

ठोरी गाउँपालिकामा १८ करोड रुपैयाँको लागतमा निर्माण भएको अस्पतालको काम सम्झौताअनुसार समयमै नसकिएको, पटक–पटक म्याद थप गरिएको र ‘कार्यसम्पन्न’ प्रमाणपत्रका आधारमा ठेकेदार कम्पनीलाई भुक्तानी भइसकेको भए पनि सेवा सुरु हुन नसकेपछि स्थानीय जनता चर्को विरोधमा उत्रिएका छन् । यसैबीच, नवनिर्वाचित माननीय टेक बहादुर शाक्यले अस्पतालको अनुगमन गरी तथ्यगत छानबिनको माग गरेका छन् ।

ठोरी गाउँपालिका र ठेकेदार कम्पनी राजेन्द्र निर्माण सेवाबीच १८ करोड रुपैयाँको अस्पताल निर्माण सम्बन्धी सम्झौता भएको थियो । सम्झौताअनुसार अस्पतालको निर्माण कार्य २०८१ साल फागुन २१ गतेभित्र सम्पन्न गरिसक्नुपर्ने थियो । तर, उक्त मिति बितिसक्दा समेत निर्माण कार्य पूर्ण रूपमा सम्पन्न हुन सकेन । त्यसपछि गाउँपालिकाले ठेकेदार कम्पनीलाई पटक–पटक म्याद थप गर्दै लग्यो । तर, म्याद थप गर्दा पनि अस्पताल सञ्चालनका लागि आवश्यक पूर्वाधार तयार हुन नसकेको स्थानीयवासीले बताएका छन्।

सबैभन्दा विवादास्पद पक्ष भनेको निर्माण कार्य अधुरै हुँदै ‘कार्यसम्पन्न’ प्रमाणपत्रका आधारमा ठेकेदार कम्पनी राजेन्द्र निर्माण सेवालाई भुक्तानी भइसकेको छ । स्रोतका अनुसार ठेकेदार कम्पनीले कागजी रूपमा निर्माण सम्पन्न भएको देखाउँदै भुक्तानी लिइसकेको तर जमिनमा अस्पताल सञ्चालनको अवस्थामा नभएको पाइएको छ । भुक्तानी भइसकेपछि पनि अस्पताल सञ्चालनमा नआएपछि स्थानीय जनता चर्को विरोधमा उत्रिएका हुन् । स्वास्थ्य सेवाको आधारभूत आवश्यकता पूरा गर्न नसक्दा स्थानीयवासीले वर्षौंदेखि सास्ती खेप्दै आएको भन्दै उनीहरूले ठेकेदार कम्पनी र गाउँपालिकाको लापरवाहीविरुद्ध आवाज उठाएका छन् ।

एक स्थानीयले भने, “१८ करोडको अस्पताल बन्यो भनियो, तर हामीले सेवा पाउन सकेका छैनौं। ठेकेदारलाई पैसा सकिएको रहेछ, हामीलाई उपचारको जोहो छैन । यो हामीसँगको ठगी हो ।”

स्थानीय जनताको विरोधपछि यस विषयमा तथ्यगत छानबिनको माग उठेको छ । निर्माण सम्झौता, म्याद थपको आधार, ‘कार्यसम्पन्न’ प्रमाणपत्र जारी गर्ने प्रक्रिया र भुक्तानीको विवरण सार्वजनिक गर्नुपर्ने माग स्थानीयले राखेका छन् । उनीहरूले यस विषयमा स्वतन्त्र छानबिन समिति गठन गर्न समेत दबाब दिएका छन् ।

यसैबीच, नवनिर्वाचित माननीय टेक बहादुर शाक्यले अस्पताल निर्माण स्थलको अनुगमन गरेका छन् ।माननीय शाक्यले भने, “ठेकेदारलाई भुक्तानी भइसकेको तर सेवा सुरु नहुनु गम्भीर विषय हो । मैले स्थानीय जनताको माग अनुसार तथ्यगत छानबिनको लागि पहल गर्नेछु । यसमा संलग्न जोकोहीले जिम्मेवारी लिनुपर्छ ।”

अहिले अस्पताल निर्माणको सम्पूर्ण विवरण सार्वजनिक गर्न, छानबिन समिति गठन गर्न र सेवा सञ्चालनको वास्तविक मिति तोक्न स्थानीय जनताको दबाब बढ्दै गएको छ । माननीय शाक्यको अनुगमनपछि यस विषयमा थप पहल हुने अपेक्षा गरिएको छ ।

स्थानीय जनताले आगामी दिनमा थप आन्दोलनको चेतावनी दिएका छन् भने ठेकेदार कम्पनी राजेन्द्र निर्माण सेवाले भने आफूहरूले निर्माण कार्य सम्पन्न गरिसकेको र भुक्तानी प्रक्रिया नियमित रहेको प्रतिक्रिया दिएको छ । तर, सेवा सुरु नहुनुको जिम्मेवारी भने गाउँपालिकाको प्रशासनिक ढिलाइ रहेको उनीहरूको दाबी छ ।