वीरगञ्ज । पर्सा निर्वाचन क्षेत्र नम्बर–३ को मतगणना प्रक्रिया सुरु भएको छ। शुक्रबार बिहान ९ बजे सम्पन्न सर्वदलीय बैठकपछि औपचारिक रूपमा मतगणना कार्य प्रारम्भ गरिएको हो।
जिल्ला प्रशासन कार्यालय पर्साका अनुसार निर्वाचन आयोगले निर्धारण गरेको मापदण्ड तथा पूर्वतयारीअनुसार मतगणना अघि बढाइएको छ। मतगणनालाई व्यवस्थित, निष्पक्ष र पारदर्शी बनाउन आवश्यक सुरक्षा व्यवस्था मिलाइएको प्रशासनले जनाएको छ।
पर्साका प्रमुख जिल्ला अधिकारी भोला दहालले मतगणना कार्यलाई तीव्र गतिमा अघि बढाइएको जानकारी दिँदै सबै प्रक्रिया सहज रूपमा सञ्चालन भएमा आगामी २४ घण्टाभित्र अन्तिम मतपरिणाम सार्वजनिक गर्ने तयारी रहेको बताए।
मतगणनास्थलमा प्रमुख राजनीतिक दलका प्रतिनिधि, सुरक्षाकर्मी तथा निर्वाचन अधिकृतको उपस्थिति रहेको छ। मतगणना निष्पक्ष र व्यवस्थित रूपमा सम्पन्न गराउन प्रशासन तथा सुरक्षा निकाय सक्रिय रूपमा परिचालित रहेका छन्।
यस निर्वाचन क्षेत्रको नतिजालाई राजनीतिक रूपमा चासोका साथ हेरिएको छ। उम्मेदवारहरूबीच कडा प्रतिस्पर्धा रहेको भन्दै स्थानीय स्तरमा मतपरिणामप्रति उत्सुकता बढेको छ।