वीरगन्ज, १३ भाद्र _ आनन्द पटेल
लायन्स क्लब अफ पिंक सिटि वीरगन्जले वीरगन्ज कपडा बैंकलाई कपडा सहयोग प्रदान गरेको छ। क्लबका अध्यक्ष पिंकि साहको अध्यक्षतामा र फर्स्ट भिडिसी रामबिहारी पाण्डेको प्रमुख आतिथ्य तथा एरिया चिफ रामेश्वर प्रसाद गुप्ताको विशेष आतिथ्यमा मंगलबार वीरगन्ज कपडा बैंकको कार्यालयमा १ बोरा र १० झोला कपडा हस्तान्तरण गरिएको हो।
सो अवसरमा क्लबका सेकेन्ड चेयरपर्सन डा. सुनिल कुमार गुप्ता, समाजसेवी चन्द्रशेखर तिवारी, सचिव नितु गुप्ता, सहसचिव ब्युटी जैसवाल, सदस्यहरु रुपशिला जैसवाल, जुलि बर्णवाल, मुन्नी जैसवाल, साथै वीरगन्ज कपडा बैंककी कर्मचारी शोभा देवीको पनि उपस्थिती रहेको थियो।
अध्यक्ष पिंकि साहले वीरगन्ज कपडा बैंकले विगत केही वर्षदेखि असहाय तथा विपन्न परिवारलाई नया कपडा उपलब्ध गराउँदै आएको निःस्वार्थ सेवाभावको प्रशंसा गर्दै आगामी दिनमा पनि सहयोग जारी रहने प्रतिबद्धता व्यक्त गरे।
प्रमुख अतिथी रामबिहारी पाण्डेले भने, “हाम्रो मूल मन्त्र हो – तपाईं संग धेरै छ भने हामीलाई दिनुस्, आवश्यकता छ भने निशुल्क लिएर जानुस्। कोइ नाङ्गो नरहोस्, सबैले जाडोमा न्यानो कपडा लगाओस्।” उनले लायन्स क्लबले देश–विदेशमा आपत परिस्थितिमा असहायको निःस्वार्थ सेवा गर्दै आएको बताउँदै अन्य संघ-संस्थाहरुलाई समेत सहयोग गर्न प्रेरित गरे।
वीरगन्ज कपडा बैंकका अध्यक्ष लालबाबु सिंहले लायन्स क्लब अफ पिंक सिटिको योगदानको प्रशंसा गर्दै भने, “विगतमा पनि लायन्स क्लबले विभिन्न सामाजिक कार्यहरुमा सक्रिय भूमिका खेलेको छ। नियमित रुपमा कपडा सहयोग गरेकोमा हाम्रो अभियानलाई ऊर्जा थपिएको छ। यसैले लायन्स क्लब परिवारलाई हार्दिक धन्यवाद छ।”
